கர்நாடகா மாநிலம் பெங்களூருவில் உள்ள சாலைகள் கடும் போக்குவரத்து நெரிசலால் தவித்து வருகிறது. குறிப்பாக ஓல்டு மெட்ராஸ் ரோட்டில் ஏற்பட்டுள்ள சிக்கலுக்கு தீர்வு காணும் வகையில் போக்குவரத்து மாற்றங்கள் செய்யப்பட்டுள்ளன. எனவே மாற்று வழித்தடங்களில் வாகன ஓட்டிகள் பயணிக்குமாறு கேட்டுக் கொள்ளப்பட்டுள்ளது.
ஐடி தலைநகர் என்று அழைக்கப்படும் பெங்களூருவில் ஏற்பட்டு வரும் கடும் போக்குவரத்து நெரிசல் பொதுமக்களை பெரிதும் பாதித்து வருகிறது. இது சுற்றுச்சூழல் மாசுபாடு, பொதுமக்களுக்கு உடல்நலக் குறைவு, நேர விரயம், எரிபொருள் மற்றும் பணம் செலவு உள்ளிட்டவற்றுக்கு வித்திட்டு விடுகிறது.
பிராண்ட் பெங்களூரு திட்டம்:
இத்தகைய சிக்கல்களுக்கு தீர்வு காணவும், புதிய உள்கட்டமைப்பு வசதிகளுக்காகவும் ”பிராண்ட் பெங்களூரு” என்ற திட்டத்தை கர்நாடகா மாநில அரசு முன்னெடுத்துள்ளது. இருப்பினும் இதற்கான பணிகள் மீது பொதுமக்கள் அதிருப்தி தெரிவித்து வருகின்றனர். பெங்களூரு நகரில் போக்குவரத்து நெரிசலில் சிக்கி தவிக்கும் சாலைகளில் ஒன்று ஓல்டு மெட்ராஸ் ரோடு – கே.ஆர்.புரம் போலீஸ் ஸ்டேஷன் சாலை.
இந்த நெருக்கடியை குறைக்கும் வகையில் சில போக்குவரத்து மாற்றங்களை போலீசார் அறிவித்துள்ளனர். அதன்படி, ஓல்டு பெங்களூரு ரோட்டில் உள்ள பெங்களூரு மாநகராட்சி ஜங்ஷன் முதல் கே.ஆர்.புரம் சட்டம் ஒழுங்கு போலீஸ் ஸ்டேஷன் அருகில் உள்ள கால்நடை மருத்துவமனை வரை ஒருவழிப் பாதையாக மாற்றப்பட்டுள்ளது.
போக்குவரத்து மாற்றம்:
மேலும் பெங்களூரு மாநகராட்சி ஜங்ஷனில் உள்ள யூ-டர்ன் மூடப்பட்டுள்ளது. ஓல்டு மெட்ராஸ் ரோட்டில் இருந்து கே.ஆர்.புரம், டி.சி.பால்யா, அனந்தபுரா நோக்கி செல்லும் வாகனங்கள் ஃபிரீ லெப்ட் எடுத்து செல்ல வேண்டும். ஐடிஐ கேட்டில் இருந்து ஓஸ்கோடே செல்லும் பெங்களூரு மாநகரப் பேருந்துகள் ஸ்ரீ ராமா மருத்துவமனை அருகிலுள்ள பேருந்து நிறுத்தத்தில் பயணிகளை இறக்கி விட வேண்டும்.
ஐடிஐ கேட்டில் இருந்து டீசல் ஷெட் ரோடு நோக்கி மாநகரப் பேருந்துகள் அரசு கல்லூரி ஜங்ஷனில் யூ-டர்ன் எடுக்க வேண்டும். அப்படியே பணிமனை வரை செல்லலாம். அனந்தபுராவில் இருந்து கே.ஆர்.புரம் நோக்கி செல்லும் வாகனங்கள் கோடே வெங்கடரமணா சுவாமி கோயில் அருகில் லெப்ட் டர்ன் எடுக்க வேண்டும்.
இதையடுத்து ஓல்டு மெட்ராஸ் ரோட்டை நோக்கி செல்லலாம். பின்னர் ஜி.ஆர்.டி அருகில் யூ-டர்ன் எடுக்க வேண்டும். டி.சி.பால்யாவில் இருந்து பெங்களூரு நகருக்குள் செல்லும் வாகனங்கல் முனியப்பா கார்டன் அருகில் லெப்ட் டர்ன் எடுக்க வேண்டும். அதன்பிறகு அரசு கல்லூரி சாலை வழியாக அரசு கல்லூரி ஜங்ஷனுக்கு செல்ல அறிவுறுத்தப்பட்டுள்ளது.
