அண்ணா பல்கலைக்கழக மாணவி பாலியல் தொல்லைக்கு ஆளாக்கப்பட்ட சம்பவத்தில் எதிர்க்கட்சி தலைவர் எடப்பாடி பழனிசாமி பல்வேறு கேள்விகளை எழுப்பியுள்ளார். சில விஷயங்களை காவல்துறை உயர் அதிகாரிகள் மறைப்பதாக சுட்டிக் காட்டியுள்ளார்.
முக்கிய அம்சங்கள்:
ஞானசேகரன் செல்போனில் சார், சார் என்று பேசியது யாரிடம்?
100க்கு போன் செய்தாரா, காவல் நிலையத்தில் நேரடியாக புகார் அளித்தாரா?
முரண்பட்ட தகவல் என்று எடப்பாடி பழனிசாமி புகார்
சென்னை ராயப்பேட்டையில் உள்ள எம்.ஜி.ஆர் மாளிகையில் இன்று மாலை செய்தியாளர்களை சந்தித்தார் எதிர்க்கட்சி தலைவரும், அதிமுக பொதுச் செயலாளருமான எடப்பாடி பழனிசாமி. இவர் அண்ணா பல்கலைக்கழகத்தில் மாணவி ஒருவருக்கு நடந்த பாலியல் அத்துமீறல் தொடர்பாக சில கேள்விகளை முன்வைத்தார். அதாவது, உலக அளவிலே புகழ்பெற்ற பல்கலைக்கழகமாக அண்ணா பல்கலைக்கழகம் திகழ்ந்து கொண்டிருக்கிறது.
எடப்பாடி பழனிசாமி கேள்வி:
இங்கு 23ஆம் தேதி இரவு 7.45 மணியளவில் ஞானசேகரன் என்பவர் அத்துமீறி நுழைந்து, அந்த பல்கலைக்கழக வளாகத்தில் பேசிக் கொண்டிருந்த மாணவன் மற்றும் மாணவியை பார்த்துள்ளார். அப்போது அந்த மாணவனை அடித்து உதைத்து, அங்கிருந்த மாணவியை பலாத்காரமாக அழைத்து சென்று பாலியல் வன்கொடுமை செய்ய முயற்சி செய்திருக்கிறார். அந்த செயல்பாட்டை செல்போனில் ஞானசேகரன் படம்பிடித்ததாகவும் மாணவி போலீசில் புகார் அளித்துள்ளார்.
அண்ணா பல்கலைக்கழக சம்பவம்:
பாலியல் சீண்டலில் ஈடுபட்டு கொண்டிருந்த போது ஞானசேகரனுக்கு செல்போன் அழைப்பு வந்துள்ளது. அதில் யாரிடமோ சார், சார் என்று பேசியுள்ளார். அந்த சார் யார் என்பதை காவல்துறை இதுவரை வெளிப்படுத்தவில்லை. இந்த விவரங்கள் அனைத்தும் காவல்நிலையத்தில் மாணவி அளித்த புகாரில் தெரிவிக்கப்பட்டுள்ளது. ஆனால் காவல் உயர் அதிகாரி அவர்கள், பாலியல் சீண்டலில் ஈடுபட்டது ஒருவர் தான். அவர் ஞானசேகரன் தான் என்கின்றார்.
சிசிடிவி கேமராக்கள் சர்ச்சை:
அப்படியெனில் போனில் சார், சார் என்று பேசியது யாரிடம். அதுமட்டுமின்றி பல ஆயிரம் மாணவர்கள் படிக்கும் அண்ணா பல்கலைக்கழகத்தில் எப்படி அந்த நபர் சாதாரணமாக சுற்றி திரிய முடிந்தது. பெற்றோர்கள் பெரிதும் அச்சப்படுகின்றனர். அந்த பல்கலைக்கழகத்தில் பொருத்தப்பட்டுள்ள சிசிடிவி கேமராக்களில் 56 மட்டுமே இயங்குகின்றன. மற்றவை ஏன் இயங்கவில்லை. இப்படிப்பட்ட நிலையில் தான் அரசு செயல்படுகிறதா? இந்த ஞானசேகரன் சரித்தர பதிவேடு குற்றவாளி.
அமைச்சரின் முரண்பட்ட கருத்து:
இப்படிப்பட்ட நபர் தங்கு தடையின்றி அண்ணா பல்கலைக்கழகத்தில் சென்று வரும் நிலையிலா வைத்திருப்பது? காவல்துறை ஆணையர் கூறுகையில், 100க்கு கம்பிளைன் வந்தவுடன் வழக்குப்பதிவு செய்யப்படுகிறது. இன்றைய தினம் அந்த துறையின் அமைச்சர் சொல்கிறார், 100க்கு கம்பிளைன் வரவில்லை. காவல் நிலையத்திற்கு நேரில் வந்து தான் புகார் அளித்ததாக முரண்பட்ட தகவலை கூறியிருக்கிறார். எனவே உண்மை நிலையை தெரிந்து கொள்ள இந்த வழக்கை சிபிஐ வசம் ஒப்படைக்க வேண்டும் என்று கேட்டுக் கொண்டார்.
